Min Name isch Sabine Anja, doch bekannt bini bi dä meischte als Biene.
Mini Hobbies sind rede und lache mit andere Mänsche, ine zuelose.
Ich bevorzug's am Wasser, uf Bärge oder i Wälder z'si, tue megagern sauniere und wandere, gnüüsse mis schöne Diheime und gern eifach di ruhige Siite vom Läbe. Lärm und Hektik bruchi nöd.
Poetry Slammer verehri, Musig liebi, Film gnüüssi. Und wenn ich biz extra Zyt und Luscht druuf han, tueni eigeni Bilder male sowie Gedicht und Gschichte schriibe, mir Gedanke über mini Innewält mache.
Wie Ihr denn i mine Gschichte und Gedicht gsehnd, dreit sich bi mir viel um d'Liebi, vieles isch entschtande woni 20gi gsi bin.
No hani mini gross Liebi noni troffe, das wird aber sicher irgendeinisch passiere, da glaub ich fescht dra. Dä Richtig für mich isch uf dem Planet, und wie dä Richard Bach mal so schön gschriebe het, er isch uf dä gliiche Brugg wie ich, nur am andere Änd. Und mer laufet ufenand zue... nur wüsse mer halt nöd, wie lang die Brugg isch, und offebar het's no Näbel momentan.