Sämtliche Texte sind persönlich und dürfen daher nicht kopiert werden !
******
SICH VERLÜÜRE... (copyright Sabine Wirth, 1995)
Bruuche ich wahri Flügel us Fädere um Flüüge z'lerne? Bini ohni dere Hilf verloore, am Bode agchetted ond z'schwäär für schööni Luft-Abentüür? Wenn ich d'Auge schlüüsse am Abig, so tüend sich ab ond zue ganz noii Wälte uuf. Hinter em Gitter vo mim Realitätsdänke gsehne ich än unbegränzte Ruum, frei ond farbig. Rägeböge schpiled met dä Wulche ond Sunneschtrahle ond derzwüsche tauche ich dur glitzerndi See, düse dur di warmi, beruhigendi, iischlööferndi Luft. Mis Härz wird unghüür schwär, ich falle ond schtiige, ghei i mich sälber ine ond doch fühle ich mich riesegross. Die Gfühl sind unheimlich bewegend und faszinierend. Doch sobald ich mir bewusst wirde, dass ich schlooffe ond dass ich jetzt jo eigetlich freie Wille hetti, um alles z'mache ond denn selbverschtändlicherwiis mit allne Fründe überall hizgoh, denn hört er sofort uuf. Die Troim hend kein Schtundeplan, me cha si ned erzwinge, si hend eigeti Regle ond Ziil. Doch d'Vorfroid, dass es irgend-einisch besser ond intensiver, bewusster wird..., die isch sehr gross. Doch ich ha Ziit ond cha warte. D'Nacht vo dä Nächt wird einisch cho, ond denn wirde ich bereit si zum reise in gränzelose Ruum use. Mir gfallt's aber au eso, s'muess jo ned grad überirdisch si, mis Läbe.
*****
SELBSCHTERKÄNNTNIS (copyright Sabine Wirth, 1995)
Ned enander verändere. Nur sich sälber, falls nötig... Mer sind jo total zfride, grad ebe well mer so sind wie mer sind. Vor allem d'Gägewart schätze ond jedes Momäntli gnüüsse. Unabhängig sii ond bliibe. Dä ander interessant bliibe laa, i dem mer em Freiheit ond vell eigeni Gheimnis gwährt ond ihm sälbverschtändlich alli Wäg fürs Läbe offe laat. Äs tuet sehr weh, wenn mer merkt, dass mer abhängig worde isch, der wemmer gschpürt, dass am andere sis Glück nümme us dä eigete Wünsch entschtaat. Schtarch sii ond öpper schtarchs ond sälbschtändigs a dä Siite z'ha - das isch doch würkli än traumhafti Sach. Immer a sich sälber schaffe, wiitergah, sich positiv verändere, jedoch nur wemmer sälber devo überzüügt isch, ned nume für dä ander... Schliesslich söll das jo Liebi sii ond ned ä Muur mit Schtahlgitter, wo eim iischränke ond verletze tüend !